ஆயிரம் தொட்டிகளில் எட்டு லட்சம் வருமானம்! என்ன ஆச்சர்யமாக இருக்கின்றதா?
யாழ்ப்பாணத்தில் முன்னைய காலங்களில் அவ்வளவாக பரிச்சயமில்லாத ஒரு தொழில்! தற்போது இந்த பாசி வளர்ப்பு பற்றிய விழிப்புணர்வு தொழில் முதலீட்டாளர்களிடமும், சுய தொழில் முனைவோரிடமும் காணப்படுகின்றது. வெறும் காலை வழுக்குகின்ற பாசி தானே என்று அலட்சியப்பட்டால், எல்லா தொழில் போலவும் இதிலும் நன்மை., தீமை, நெளிவு சுளிவு எல்லாமே தேவை என இடித்துரைக்கின்றார் வல்வெட்டித்துறையை சேர்ந்த திரு நாகராஜா.
இப்பாசி குறுகிய காலத்தில் பலனை தரக்கூடியது. கிட்டதட்ட 45 நாட்கள் போதுமானது. அதாவது புரொயிலர் கோழியின் வளர்ப்புக்கு ஒப்பானது இந்த பாசி வளர்ப்பு. கடல் தொழில் செய்து கொண்டே இதனையும் மேற்கொள்வதாலும் வருமானத்தினை ஈட்டிக்கொள்ள முடியும் என்கின்றார்.
இதோ அவருடனான கலந்துரையாடலில் சில சுவாரஸ்யமான விடயங்கள்.
பாசி வளர்ப்பானது எல்லா கடலிலும் செய்ய முடியுமா?
இல்லை, இப்பாசி வளர்ப்பானது ஆழமான கடல்களான பருத்தித்துறை கடல், வல்வெட்டித்துறை கடல் போன்ற கடல்களில் வளர்க்க முடியாது.ஆழம் குறைந்த கடல்களான காரைநகர் கடல், தீவுப்பகுதி கடல்,பூநகரி கடல், எழுவைதீவு கடல் போன்ற ஆழமற்ற கடல்களில் இது வளர்க்கப்படுகிறது. இங்கு எட்டு(8) வகை பாசிகள் ஒன்றாக சேர்த்து வளர்க்கப்படுகிறது. இப்பாசி மூன்று முறைகளில் வளர்க்கப்படுகிறது. இதில் பிரதானமாக இலங்கையில் மூங்கிலத்தொட்டி பாசி வளர்ப்பு மேற்கொள்ளப்படுகிறது.
தொட்டி அமைக்கப்படும் முறை பற்றி கூறுங்கள்?
இதற்கு மூலதனமாக மூங்கில் கம்புகள், வலைகள் என்பன பயன்படுத்தப்படுகிறது. மூங்கில் தொட்டி முறையானது மூங்கில் கம்புகளை வைத்து சுற்றிவர வலையினால் கட்டப்பட்டு அறுகோண வடிவத்தில் இத்தொட்டி அமைக்கப்பட்டு அதற்கு கீழாகவும் வலை கட்டப்பட்டும். இதனால் மீன்களின் மூலமான பாதிப்புக்கள் குறைக்கப்படும். இப்பாசியானது 4 அடி ஆழத்தில் வளர்க்கப்படுகிறது.
வளர்ப்பு முறை எவ்வாறு செய்யப்படுகின்றது?
100g இருந்து 200g பாசியின் நிறையானது கையில் எடுக்கப்பட்டு கட்டப்படட மூங்கில் தொட்டி பாத்தியில் 12 ஒரு சாணுக்கு ஒருக்கான இடைவெளியில் விதைக்க வேண்டும். இப்பாசியானது 45 நாட்களுக்கு பிறகு அறுவடை செய்யப்படுகிறது. 45 நாட்களுக்கு பிறகு 5 மடங்கிலிருந்து பாசியானது 10 மடங்கு சாதாரண வளர்ச்சியடையும். இதே நல்ல கால நிலையின் போது 10 மடங்குகிலும் அதிகமான அதிதவளர்ச்சியடையும்.
விற்பனை பற்றி கூறுங்கள்?
இப் பாசியானது வளர்க்கப்பட்டு 45 நாட்களின் பிறகு (1 1/2 மாதம் ) தான் விற்கப்படுகிறது. இது கிடைக்கப்பெறும் நிறையின் அடிப்படையில் விற்பனை செய்யப்படுகிறது. அதாவது 1Kg பாசியானது 10/= ஆகவும் நன்கு உலர்த்தப்பட்ட பாசியானது 50/= ஆகவும் விற்பனை செய்யப்படுகிறது. இதன்படி ஒரு மூங்கில் தொட்டியிலிருந்து கிடைக்கும் பாசிகளானது 1500/= விற்பனை செய்யப்படுகிறது. இதே 1000 மூங்கில் தொட்டிகளில் இப்பாசியை வளர்ப்பதன் மூலம் 45 நாட்களின் பிறகு 8 லட்சம் வரை வருமானம் ஈட்டலாம்.
இப்பாசிகளுக்கான சந்தை வாய்ப்புக்கள் இலங்கையில் காணப்படுகின்றதா?
ஆம், இந்த பாசி வளர்ப்புகளுக்கு எமக்கு மிகவும் ஒத்துழைப்பு தருவது Hayleys எனும் நிறுவனமாகும்.இந்நிறுவனமே இதனை உற்பத்தியாளர்களிடம் பெற்று வெளிநாடுகளுக்கு உள்நாட்டுக்கும் விநியோகம் செய்கிறது. Hayleys நிறுவனமே இத்தொழிலுக்கான சகல உதவிகளும் தமக்கு செய்துதருவதாக அவர் மேலும் குறிப்பிட்டார்.
என்ன தேவைக்காக இப்பாசிகள் பயன்படுத்தப்படுகின்றன?
இதனை மென்பானங்கள், ஜெலி, பற்பசை போன்ற தயாரிப்புகளுக்கும் சுவையூட்டிகளாகவும் பயன்படுத்தப்படுகிறது.
இதில் ஆண்களுக்கா பெண்களுக்கா வாய்ப்புக்கள் அதிகம்?
இது பெருமளவில் பெண்களுக்கான வேலைவாய்ப்பே ஆகும். அவர்களது ஓய்வு நேரத்தில் பொழுது போக்குக்காகவும், வருமானத்துக்காவும் இந்த தொழில் ஈடுபடலாம்.
நன்றி :கௌசி
